Kişi üslubunda köşə
Yaxud kişilər belə yazardı

Qadınlar həyatının ən qiymətli hissəsini kişiyə bəxşiş edirlər.
Sonra hər şeyi pula çevirib, xırdalayıb geri alırlar.
Oskar Uald

Tanışlarımdan biri çatda qızıyla şəklini qoyub. Elə bil ki, hamıya «evliyəm ha, toxunma» demək istəyir. Guya evli kişini subaydan ayırmağın yollarını bilmirik. Anadangəlmə intuisiyanı bir qırağa qoyaq, bunu sübuta yetirən dilsiz ağızsız «çığıran» əlamətlər də var ki, yarlık kimi üstündən asılır və «zanitdi» deyib gözəl qadınları hürküdür.
Əvvəla, evli kişilərin üzüyü olur. Bəzilərinin barmağında, bəzən maşının bardaçokunda, bəlkə çantasının dibində, bəlkə də evdə qızıl mücrüsündə mütləq üzüyü olur. Bəzilərinin üzük ürəyindən asılır elə bil. Üzük ki, oldu, deməli burda qadın da var. Üzük olan yerdə qadın olmaya bilməz. Bu aksiomadır. Yoxsa kişini üzük taxsmağa kim məcbur edə bilərdi ki?
Əgər kişi nəsə gizləyirsə deməli gizlətməyə adamı var. Nəsə deyəndə adətən pul nəzərdə tutulur. Axı insan tək olanda nəyisə gizlətməyə ehtiyacı olmur? Pulun başından aşırsa da hamısı səninkidir. Əgər gizlədirsənsə mümkün qədər çox pulu aradan çıxarmalısan. Trafeyini etibarlı yerdə gizlədib varidatının tam sahibi olmalısan və ən vacibi sonra gizlədiyin pulu çox operativ şəkildə xərcləməlisən ki, duyuq düşən olmasın. (Kişilər, sadaladığım əlamətlərin sırasını qarışdarmayın ha. Bəzən olur ki, axırıncı punktdan başlayırsız.) Adama elə gəlir ki, bankomatları da evli kişilər düşünüb tapıb. Yoxsa, qadınların pul gizləməyə yeri yox idi?
Evliliyi büruzə verən ən xəyanətkar əlamətlər qarın və buxağın sərhədləri aşıb keçmiş ölçüləridir. Azadlığını əldən vermiş kişinin birgə qazancı var, o da vaxtı-vaxtında və çoxlu yemək yemək. Mətbəxdə «ölənəcən» yedizdirilmiş kişinin əvvəlcə qarnı, sonra baxağı sərhədlərini aşır. Bir neçə ildən sonra kişinin üzündə razılıq adlandırıla biləcək bir ifadə əmələ gilir ki, onu heç cür təklikdə, dostlarınla, restoranlarda, qonaqlıqlarda yeyib doymaqla qazanmaq mümkün deyil. Qarın və buxaq bir yana, amma evli kişinin gözündəki ifadə - onu «tox pişik» də adlandırmaq olardı- bütün kartları bir saniya içində açır. Tox pişik kimi ona da heç kim lazım deyil. Gözündəki işartı çoxdan sönüb. Hətta gözləri axtarırsa da, orda parıltı əvəzinə qaz plitəsinin alovu görünür.
Bütün evli kişilər üçün, yaxşı ya pis olmasından asılı olmayaraq 8 mart ən mənasız bayram sayılır. Daha doğrusu ona «qara gün» də deyərdi, arvadını incitməkdən qorxmasaydı. Hədiyyə axtararkən mağazaları əldən salıb özünü ora-bura vuran kişilər hələ ki, «Axı kimdir günahkar?!» sualına cavabı tapmayıblar. Bəziləri dəqiq bilir ki, əziyyətləri Klara S. və Roza L. adlı iki xanımın ucbatındandı. Neynəsinlər, kişi sevgisinə tamarzı qalmışdılar da! Odur ki, kişilər, qadınları bərk-bərk sevin, yoxsa onlar başqa bir işgəncə düşünüb taparlar.
Subay, ya da evli kişinin evinin kandarından içəri keçən kimi burda qadının olub olmamasını anlamaq olur. Evin xanımı səliqəli də ola bilər, pinti də. Amma qadınlar ərazilərini qoxularla işarə edirlər, lap təbiətdə erkək heyvanlar kimi. Hamamda diş pastası, yataq otağında kremlərin qoxusu, pomada, kosmetika və ətir iyi hər yerdə. Kifayət etməsə, yəni ərazi böyük olsa orda-burda qoyulmuş üzüklər, bilərziklər,böyunbağılar, olmasa lap başmaqlar «Mən burdayam!» deyib çığıracaq. Qadın evdədirsə mütləq yemək iyi çıxaracaq. Ya dezozorantın, lap bəd ayaqda güvəyə qarşı vasitənin, xlorun, tarakan dərmanının iyini evə buraxacaq. Ola bilər bu o qədərdə humanist hərəkət deyil. Bütün bunlar qadının həyat və fəaliyyətindən alınan əlavə məhsullardır. Deyirlər, qadınlar olmayanda bütün bunlar da yoxuydu. Mən xatırlamıram.
Evdə qadının olmasını sübuta yetirən ən böyük əlamət uşaqlardı. Əlbəttə, qadın olmasa uşaq hardan əmələ gələsidi ki? Bunu hətta elm də sübuta yetirib ki, uşaqlar kolbada yetişdirilmir! Dibçəkdə də böyümür.
Bankomatları kişilər fikirləşibsə də şkafda adam gizləməyi qadınlar kəşf edib. Məşhur lətifədəki kimi kimsə orda oturub tramvay gözləyirsə bunu yalnız qadın uydura bilərdi. Sonra bu situasiyadan çıxmağın yollarını da eləcə…
Bir də ki, əgər sizin ev telefonunuz daim məşğuldursa deməli tək deyilsiz. Nə qədər ki, evlilik statusunuz yox idi bir-birinizlə danışırdız. Qohumlar bir kəlmə söz deməkçün saatlarla sizə zəng edirdi. Evlənəndən sonra isə o, sizin telefonda başqaları ilə danışır. Hər bir halda tanışdarınız sizinlə söhbətə həsrət qalır. Bundan sonra qadınlara yumşaq desək istismarçı, bir az istiotlu danışsaq canavar necə deməyək?