|
Ad
günü
Mayın 10-da doğulanlara ithaf edilir
Sabah mayın 10-dur. Sabah şəhərimizdə, ölkəmizdə bayram ediləcək. Bir
neçə ayın zəhmətinin nəticələri göz qabağında olacaq. Quraşdırılan bayram
meydançaları çəkicin səsindən qurtulub başqa səs-küyə dücar olacaq. Bunu
hamı bilir, sabah qeyri-adi gündü.
Mən də uşaqlıqdan bəri bilirdim ki, mayın 10-u adi gün ola bilməz. Axı,
bu gündə mən doğulmuşam. Dünyada heç bir qüvvə məni inandıra bilməzdi
ki, mayın 10-da günəş adi qaydada çıxır, planetlər həmişəki avazıyla fırlanır.
Zaman da sübut elədi ki, mən haqlıymışam. Bu günün xeyri bağışlanan hədiyyələr,
deyilən təbriklə və tostlarla məhdudlaşmır. Onsuz da istədiyimi bağışlamırlar.
Hər kəs cibinə uyğun hədiyyə verir. Belə gündə doğulduğuma görə mənə həsəd
aparanlar bilirsiz nə qədərdir? Axır 3-4 ildə hər il 10 may ərəfəsində
şaiyə gəzir ki, mayın 10-da doğulanlara hərəyə 100 manat həcmində hədiyyə
veriləcək. Millət də mən qarışıq bu «vəd»lərə özü də hər il inanır. Ona
görə də mənə həsəd aparırdılar ki, qızın bəxtinə bir bax, gör necə gündə
anadan olub! Qeyri-adi günün xeyrindən sui-istifadə eləyib hamınızı sabah
ad gününə dəvət eləyirəm. Ünvanı yazmağa ehtiyac yoxdur, bayram hər yerdə
olacaq. Televiziyada şəklimi verməyəcəklər. Deyirəm, «Bizim Yol»da şəklim
gedir, elə bəsimdi.
İdarələr, məktəb və baxçalar təbrik yığıncağını artıq düzənləyib bitirib.
Ad günü ərəfəsində baxça müəllimi mənə bir xahişlə müraciət elədi. Musiqi
müəllimi kimi məndən tədbir üçün ulu ötdərə aid mahnı soraqlaşdı. Bu an
mən anladım ki, ulu öndərə aid layiqli uşaq mahnısı yoxdu. Beynimin dolanbaclarında
növbəti dəfə eşələnəndə hər tinbaşı Leninə həsr edilmiş mahnılar ortaya
çıxdı. Bəs mahnı olmasa ulu ötdərin tarixi rolunu uşaqlara aydın dildə
necə anlatmaq olar?
Yaddaşımda təftiş apararkən yada düşən mahnı və şerlərdən bir xeyli təsirləndim.
Yaxşı oxuyan kimi hər tədbirdə mənə şer dedizdirərdilər. Mahnı oxumaqsa
hamımızın ali məqsədiydi deyən mənim şəxsi «fonoteka»mda Lenin babaya
yazılmış azı iki düjün mahnı, toplasan bir qarış qalınlığınla olacaq kitab
qədər şer və ibrətamiz məsəllər var. İndi məni bir sual narahat eləyir:
Bəs Heydər babaya ünvanlanan mahnıları kim yazacaq?.. Məncə bizim nəsil
buna artıq yaramır. Biz baxçada şeyrlərimizi, ürəyimizin ən incə hisslərini
ünvanladığımız babanın heykəlləri qarşısında «Həmişə hazırıq» deyib vəfa
andı içmişik. Qana bulaşmış bayrağın rəmzi kimi qırmızı qalstuku boynumuzda
gəzdirmişik. Onun qızılı sarı saçlı körpəlik rəsmini, daha sonra ağıllı
baxışlı yetkin gənclik rəsmini ürəyimizin başına taxmışıq. Biz onun ideyalarının
iflasını görmüşük. Biz onun heykəllərinin aqibətini bilmişik. Dalıyca
danışılan söhbətləri eşidib arxivlər açılanda həqiqətləri öyrənmişik…
Bizdən sonrakı nəsil isə mahnılar qoşmağa, ithaflar eləməyə tamam yaramayacaq.
Yaxşı mahnıların yaranmasıyçün onları, yəni yeni nəsli yeni həqiqətlərə
inandırmaq lazımdı. Bizim nəsil inanmaqdan başqa «Oxumaq, oxumaq və yenə
də oxumaq» andını verərək bilik toplayırdı ki, babalara topdağıtmaq abidələr
ucalda bilsin. İndi ucaldılacaq abidələrə etibar «novostroyka» evlərə
olan etibar qədərdir. Bizim vaxtımızda Şaxta baba bir «Qulliver» şokoladı
gətirib əlimizə verən kimi Şaxta babanın varlığına da, hədiyyənin Lenin
babadan gəldiyinə də inanırdıq. İndikiləri inandırmağa hünər gərəkdir.
Bu boyda xərc çəkib ad günü keçirsən də cavan nəsil meydanlara tökülüşüb
səs-küy salaraq hırıldaşanda ulu öndərin ruhunun bizimlə olmasına da inanmır.
Dediyimə inanmırsızsa, sabah küçələrə tökülüşən insanların üzünün ifadəsinə
başqa cür, bir az mənim gözümlə baxın. Özünü əməlli ilarə eləyə bilməyənlərdən
babalara abidə ucaldanlar çıxmaz!
Yenə də uşaqlıq dövrümün mahnılarına heyfim gəlir. İncə, tükürpədici,
gözyaşardıcı və səmimi mahnılar idı. Çünki onu yazanlar inanıb yazıblar.
O mahnıların sözlərini dəyişdirmək də olardı. Məncə sözlərin müəlifləri
bir o qədər də inciməz. Axı onların şeyrləri bir daha unudulmayacaq. Hər
bayramda, tədbirdə və xüsusilə də mayın 10-da səslənəcək. Yeni mahnılar
yaranmırsa bu o demək deyil ki, ad günündə mahnı olmayacaq. Nəyimiz olmasa
da mahnımız boldur. Oxuyacağıq, oynayacağıq, «Qarabağ bizimdi» deyib çığıracağıq.
Məncə mayın 10-nu siz də unuda bilməyəcəksiz.
|
|
