Və bu sayt bizim canımızın bir parçası
Və bu sayt bizim ruhlara səpmək istədiyimiz bir ovuc su
Və bu sayt dincəlişin Baham adaları ...

Dəyərli, şərəfli, ləyaqətli və bunları qorumaq üçün müvafiq təminatlı oxucularımız!
Biz ki varıq, yazmağa çox meyl eləyən xalqıq. Hara gəldi yazırıq: dağa, daşa, divara. Qobustan qayalarının üstündəki yazılara beş-on min il tarix verirlər. Bixəbərlər bilmir ki, o yazılar sonunculardı. Onların altında əvvəl neçə “sloy” yazı olub. Qazıyıb, bir də yazıblar, qazıyıb, bir də yazıblar... Qayalar ona görə bu günə düşüb, elənçik bapbalacadılar. Onların bir vaxtı vardı.... (hələ şükür eləsinlər ki, salamatdılar). Əlqərəz, biz yazar xalqıq və əlimizə girəvə düşən kimi nəsə yazırıq: dərd, ələm, sevgi, söyüş... Şair gözəl deyib:
Dərdimi yazmaqdan aləmdə kağız qalmadı,
Axırı bir guşeyi-divara yazdım dərdimi...
Oxumamaq o qədər də böyük qəbahət deyil.
Lətıfə: Bir çukça yazıçılıq edirmiş. Soruşurlar ki, Şekspiri oxumusan? Deyir: “Çukça oxucu deyil, yazıçıdı...
Amma gəlin arada bir oxuyan da olaq. Oxumaq demiş,
Rablenin “Qarqantua və Pantaqruel” əsəri yadınızdadı? Görün Rable nə yazır:
«Platon öz müəllimi Sokratı silenə bənzədirdi. Bilirsiniz silen nədir? Balaca əşyalardı. Onların üstündə qəribə rəsmlər olardı: Məsələn, buynuzlu quş, Asiya yarasası, yüyənlənmiş ördək, buynuzlu dovşan, qanadlı keçi, arabaya qoşulmuş maral və başqa gülüş doğuran cızmaqaralar. Bu şəkillər adamlarda gülüş doğurardı - xeyirxah Baxusun müəllimi Silen də belə olub. Bu söz oradandır… Onların içində isə nadir dava-dərman: Məkkə balzamı, ənbər, amom, müşk, tsibet, qiymətli daşların tozu və sair və ilaxır olardı...». Yazıçı oxucuları bu yumoristik fonun arxasında əsl həqiqəti tapıb çıxarmağa dəvət edir, təbii ki, yenə özünəməxsus yumorla: «Siz kəllə sümüyü tapmış it görmüsünüzümü? (Platon «Dövlət» adlı kitabında yazır ki, it dünyada ən filosof heyvandır)» Əgər görmüsünüzsə, sezmiş olarsınız, it necə ehtiramla onu qoruyur, necə möhkəm tutur, necə ehtiyatla ağzına alır, necə ləzzətlə gəmirir, necə çalışqanlıqla sorur. O, nədən bu cür çalışır? Əlbəttə, oradakı bir damcı beyni nuş eləmək üçün. Onun bu səyləri boşuna deyil. Qalen özünün «Bədən üzvlərinin təyinatı haqqında» adlı əsərində yazır ki, beyin təbiətin bizə verdiyi ən kamil qidadır. Əziz oxucu, istərdim ki, siz də yuxarıda haqqında danışılan it kimi müdrik olasınız. Bu dadlı kitabın sümüyünü sındırın, gəmirib oradakı beyin substansiyasını sorun, … bu kitabda yalnız seçilmişlər üçün olan, dinimizə, siyasətə və evdarlığa aid çox qiymətli sirlərdən agah olarsınız, xüsusi ruh müşahidə edərsiniz».

Nə isə, Rable hər şeyi deyib. Bu sayt da, təvazödən uzaq da olsa, belənçik. Haydı, iş başına. Oxuyun, azca da olsa, dodağınız qaçsa, bu layihənin ideya müəllifi, yığıcısı, tərcüməçisi, dizayneri, redaktoru və korrektoru olan kəsləri də unutmayın: Gülnarə, Fizzə və O` (O`Kamil)

"Protivopokazaniye”:

Qəlbi qaraların bu saytı oxuması qəti qadağandı.
Bu sayta şəkk eləmək olmaz. Şəkk eləyənlərin ağzı əyilir. Yüngülvari şəkkin doğura biləcəyi ağır fəsadların bir qismi: Saçların vaxtından əvvəl töklüməsi nəticəsində keçəllik, göz xəstəlıikləri: konyuktivit və qlaukoma (sayta kəc baxanlar mütləq bu xəstəliyə tutulur), brüsselyoz, ostreoxondroz, nevroz, ateroskleroz, aterosuz skleroz...