|
Milyonlar
gətirmiş 10 axmaq fikir
Atalar «100 fikir bir manat borcu ödəmir» deyirlər. Görürsən ki, pul qazanmağın
bir yolunu tapırsan, amma dostlarına danışan kimi səni hoydu-hoyduya tuturlar.
Gülürlər və səni çox sadəlöhv sayırlar. Amma dünyada hamının axmaq saydığı
fikirlərlə milyonlar qazananlar da var. «Bishelp»in tərtib etdiyi siyahıda
əvvəlcə ən perspektivsiz sayılan, amma nəticəsi gözlənilməz olan ideyaların
siyahısı verilib. Yəqin ki, insanlarda möcüzəyə inam hədə ki, səngiməyib.
Bəlkə də həmin səbəbdən indi onların bank hesabı beyinlərindəki ideyaların
sayına yaxınlaşır.
Adıcəkilən sırada Santa Klausun poçtası ideyası birinci durur. Bu qəribə
ideyanı reallaşdırmaq üçün Şimal qütbündə, məsələn, Alyaska ştatında bir
şəhərdə poçt qutusu götürmək lazımdı. Sonra Santa Klaus roluna girib valideynləri
inandırmaq olar ki, cəmi 10 dollar verməklə uşağını sevindirə bilərsən.
Balaca xəyalpərəst ən şimal nöqtədən ona gələn məktubu oxuyub onun həqiqətən
də Santadan gəldiyinə inanacaq. İlk baxışdan primitiv görünən bu ideya
sanki alınmayacaq, yaxud kifayət qədər uğurlu olmayacaq deyə düşünürsən.
Amma 2001-ci ildən bu biznesini işə salan Bayron Riz artıq 200 min məktub
göndərib. Hər məktubu 10 dollara vurub qazancı hesablamaq çətin olmaz.
Ona görə də o, deyə bilər ki, milyonçu olmaq çətin deyil. Axı onları qazanmaqçün
heç evdən çıxmalı olmamışdı.
İtlər üçün gün eynəkləri də ilk baxışdan perspektisiz görünür. Yəni, «İtlər
günəşdən qorunmaq istərmi?», «Buna görə sahibləri pullarından keçərmi?»
kimi suallar ilk əvvəl cavabsız qalır. Bu axmaq biznes ideyanın sahibləri
artıq milyonçudurlar və hələ də gün eynəklərini bütün dünyanın itlərinə,
daha doğrusu onlarn sahiblərinə uğurla sırıyırlar.
«LaserMonks.com» - bu, Sistersian abbatlığında müəyyən profilli bir şöbədir.
Bu monastırda cəmi 8 monax qalır. Müqəddəs Məryəm monastrı Medtsondan
90 mil şimal-qərb tərəfə, Monro qraflığının təpələrində yerləşir. Sual
oluna bilər, orda nə ildə məşğul olmaq olar ki? Onlar, yəni əsil monax
paltarı geyib, monax həyatı sürən tərkidünyalar printerlər üçün kartric
doldururlar. Onların illik gəliri 2,5 milyona qədər çatır.
Orta məktəbdə olanda sinif oğlanları parta altında bir-birinə çılpaq qız
rəsmləri olan kartları gizlicə uzadır və qızlara göstərməməklə acıq verirdilər.
Kartların mövzu rəngarəngliyini görəndən sonra adam inana bilmir ki, idman
hərəkətləri çəkilmiş kartlar da o cür uğur qazana bilər. İlk baxışdan
kartda idman hərəkətləri çap edib satdırmaq dəhşətli dərəcədə axmaq ideya
kimi səslənir. Özü də hər kart dəsti 18 dollar 95 sent olarsa kim bu pulu
xərcləyər ki, donuq pozalara baxıb idman eləsin. Amma fitnes üzrə instruktor
Fil Blek keçən il vergi deklorasiyasında 4,7 milyon dollar gəlir məbləği
göstərib.
Müəlllif çantaları firmasının sahibi Kristi Reyn uşağı hələ balaca olanda
körpənin bələk əskilərini ayrıca çantada gəzdirməli olurdu. 34 yaşlı ana
həmişə qadın çantasınınn balaca olduğuna və əskilərə görə ayrıca çanta
götürməyə məcbur olduğu üçün əziyyət çəkirdi. Öz çantasına onları birtəhər
dürtəndə isə əskilər əzilirdi. Reyn əlində o qədər də böyük olmayan, gözəgəlimli,
əyin-başının üslubunu pozmayan çanta tumaq istəyirdi. Ona görə də əri
ilə birlikdə uşaq bələkləri üçün xüsusi çantalar yaratdılar və 2004-cü
ilin noybrından bəri bu işlə məşğul olurlar. İlk baxışdan sadəlöhv görünən
bu ideya bir il sonra 2005-ci ildə 180 min gəlir gətirdi. Hazırda Kristinin
«Diapees&Wipees» adlı firması 22 müxtəlif üslübda çanta istehsal edir.
Onların dünya üzrə 120 onlayn dükanı var ki, burada hər çanta 14, 99 dollara
canına yel dəyməmiş göydə qapılır.
Toyuq sümüyü ilə çəkişmisiz? Bəzən o boyla toyuğu 3-4 adam yeyir, amma
çəkişmək, daha doğrusu həmin sümüyü tapmaq bir nəfərə qismət olur. Qalanları
«Eybi yox, gələn dəfə mən taparam» deyib özünə təskinlik verir. «Lucky
Wishbone Co.» adlı firma çəkişmək üçün plastmas sümüklər təklif edir.
Bu ideya səslənən kimi «Hansı normal adam yalançı sümüklə çəkişər ki?»
demək istəyirsən. Amma hazırda bu firma günə 30 min «sümük» istehsal edir.
Onlar hərəsi 3 dollardan satılır. Satışın da faizi yüksəkdir. Keçən il
sümük satışının qədəri milyonu ötmüşdü.
Sayt üçün domen adı tapmaq üçün adam heç başqasına müraciət edərmi? Adama
elə gəlir ki, belə elanla çıxış etsən heç kim müraciət etməz. Amma «PickyDomains»
firmasının siyahısında yüzlərlə növbə gözləyənlər var. Onlar yadda qalan,
asan internet ünvanı almaq üçün zəhmətlə qazanılmış pullarına qıyırlar.
«Million Dollar Homepage» tərcümədə «Milyon piksellik əsas səhifə» deməkdir.
Burda hər pikselin qiyməti bir dollardır. İlk baxışda insan başına gəlmiş
ən axmaq ideyaya, eləcə də perspektisiz onlayn ticarətə bənzəyir. Amma
21 yaşlı Alexs Tyu artıq milyonçudur.
Siz QİÇS-ə yoluxmuş adamla görüşə gedərdiz? «PositivesDating» saytının
yaradıcıları Pol Qreyvs və Brendon Koçlin düşünür ki, bu mümkündür. Ona
görə də QİÇS-ə yoluxmuş insanlar üçün tanışlıq saytı yaradıblar. Bir il
sonra 2006-cı ilin gəliri 110 min dollar olsa da sonrakı 2 ildə gəlir
milyonluq həddi arxada qoydu.
P.S. Hərə öz beynindəki axmaq ideyalara daha rəhmdil olsa milyonçuların
da sayı artar.
|
|
