Çalış və çarpış
Amma bil ki, nəyin uğrunda…

Hər səhər adətim üzrə elektron poçtumu oxuyuram. Artıq bir neçə ildir ki, spam dolabındakı lazımsız məktublara göz gəzdirib silmək adətim var. Nəyə lazımdır axı onlar? Heç olmasa spam bölməsində səliqə olsun. Spam məktublara ötəri göz gəzdirəndə 20-30 məktubun içində hes olmasa 3-4 dənə «Viaqra» satmaq istəyən reklam xarakterli məktub olur. Bu məktubları göndərənlər uzun illərdir təkidlə mənə «Viaqra» satmağa çalışır və qadın olmağım onların heç vecinə də deyil.
Bu prosesi müşahidə etdikcə məndə belə təssürat oyanır ki, biz də həyatımızda lazımsız və mənasız işlərə can atırıq və nəticəsini fikirləşmədən hey çalışırıq. Hər gün Allahdan ağıl əvəzinə çörək istəyirik. Soyuducumuzun dolu olmasının fərqindəyik. Başın boşluğunu heç kim görmür axı. İçimizdə ən layiqliləri, yəni hər gün dua etməyi unutmayanları da ya məchul, abstrakt arzularını Yaradana ötürür, ya da bir parça çörək və bir udum hava qədər sadə şeyləri diləyərək var olduğunu sübut eləməyə çalışır. Bu yerində xama içinə düşmüş siçan balaları haqqında pritçanı da xatırlamaq olardı. Çapalayan siçan sakitcə əlini yanına salıb «Onsuz da öləcəyik» deyən o biri siçandan fərqli olaraq çalışmağıyla, çarpışmağıyla xamadan yağ əmələ gətirib qurtula bilmişdi. Xama içində üzənlərin nəzərinə! Çox çapalayanda yağ əmələ gəlir. Amma özünü yağ-bal içində duymaq üçün kimsə bura heç olmasa bir qaşıq bal əlavə eləməlidi.
Hamı çalışır, hamı çarpışır. Yaşayanlar da, bunu simulyasiya edənlər də. Biz burda qadın azadlığı uğrunda çalışarkən Qərb qadını mətbəxə, evinə, uşaqlarının yanına qaytarmağa çalışır. Son vaxtlar Britaniyada küçələrdə «İşgüzar qadınlardan pis analar əmələ gəlir» məzmunlu reklam plakatları asılıbmış. Bu plakatlar cəmiyyətin hiddətinə səbəb oldu və indi ingilis qadınları yaxşı ana olduqlarını sübut etməyə çalışarkən əlbəttə ki, işdən çıxmadılar. Onlar etiraz elədilər və hiddətləndilər. Bu hiddət cəmiyyətdə əks-səda doğurdu və tezliklə reklam plakatlarını küçələrdən yığışdıracaqlar. Yəqin etiraz edənlər ayağının altında bərk yağı hiss eləmiş siçanın duyduğu hisslərə bənzər bir duyğular keçirir. Bəlkə də daha artıq, yəni qalib olmaq ləzzətini yaşayırlar. Axı işin sonunda, çalışmağının nəticəsini gösməlisən. Məsələnin düyünü də, mahiyyəti də bundadır. Bunu sönmüş vulkandan soruşun, ya da istəklərini içində gömürmüş bizlərdən. Pardon, bunu deməyi unutdum, İngiltərədəki reklam kompaniyasının əsas məqsədi qadınları təhqir etmək yox, cəmiyyətin etiraz dərəcəsini müəyyənləşdirmək idi. Bu məsələni əlində bayraq edib cəmiyyəti qızışdıran «Mumsnet» adlı populyar ünsiyyət saytı eyni cəhdlə baş nazir Qordon Braunun müsahibə zamanı sevimli peçenyesi barədə danışmaq istəməməsini tənqid eləmişdi.
Mən birmənalı şəkildə deyə bilmirəm ki, çalışmaq lazımdı, ya yox. Bu yaxında dünyanın mədəniyyət mərkəzlərindən biri sayılan «La Skala» opera teatının kollektivi hüquqlarının pozulmasına etiraz olaraq məşhur «Karmen» operasının ifa etməyə səhnəyə gündəlik paltarlarda çıxıblar. Təsəvvür edirsiz, ehtiraslı Karmen qulağının ardına al qırmızı gül taxıb qaralı qırmızılı, qırçınlı balağını yelləmək əvəzinə aşınmış cinslərini əyninə keçirib səhnə mədəniyyəti baxımından bərbad gündə görünən Xosenin yoldan çıxarmağa çalışır. Bilmirəm «xabaneranı» oxuyarkən balaqlarını yelləmək əvəzinə aktyor nə edirmiş? Amma bu çalışqanlığı və etirazına görə tamaşaçılar tərəfindən «Biabırçılıq!» çığırtılarından ibarət atəşə tutuldular. Sən demə aktyorlar məşqlər zamanı lazım olduğundan 6 dəqiqə artıq saxlanılmağa etiraz edirmişlər. Cəmi 6 dəqiqəyə…
Ona görə də düşünürəm ki, bəlkə mən «Viaqra» satmaq istəyənlərə çox mənfi reaksiya verirəm. Bəlkə həqiqətən də nə vaxtsa bu dərmana möhtac olacağıq və spamdakı məktubların xəbərdarlığı bizə öncəgörməlik kimi gələcək. Bəlkə də həqiqətən nə vaxtsa aptekə gedib bu dərmanı soruşmaqdan utanıb «Viaqra» satanların məktublarından birini tıklayacam. Bəlkə kompüterimə viruç düşəcək, ya da düşməyəcək, bunu bilmirəm. Amma bu zaman onlar qələbə çalmış olacaqlar. Çünki uzun illər bu «Viaqra»nı mənə satmağa çalışıblar. Onda yəqin onlar xama içində çapalayıb yağ çalmış siçanın keçirdiyi hisslərə bənzər duyğular keçirəcəklər. Kompüterimə virus düşsə yəqin mən xama içində boğulub qalmış o biri siçan kimi «Eybi yox, bu dəfə alınmadı» deyəcəm.