Ah, bu gecə, bu gecə…
Yaxud hər yer Amerika, hər gün Hellouin

Bu gün, daha doğrusu 31-dən 1-nə keçən gecə Amerikanın lap kiçicik şəhərlərində belə insanlar cin-şeytan paltarı geyib axmaq-axmaq işlər planlaşdırıb ciblərini şirniyyatla doldurmaqçün küçələrə axışır. Bayram Hellouin gecəsi, yaxıd bütün müqəddəslərin günü adlanır. Sevdiyimiz «Hello» çağırışına bənzədiyinə görəmi, ya yox, bunu bilmirəm, bu bayram bütün dünyanı əlinə alıb. Hellouin gecəsiylə maraqlananda anladım ki, əslində bu bayram bizdə çox qədimdən qeyd olunur, hətta demək olar ki, milli bayramımızdı.
Bu gün çox qorxulu gecədir, çünki həyat və ölüm arasındakı sərhədlər silinəcək, o dünyanın bütün murdarlıqları yer üzünə qayıtmaq cəhtləri edəcək. Qorxulu məxluqlardan qorunmaq istəyənlər üz-cözünü külə batıracaq (bu məqamda bizim başına kül ələmək ənəsini xatırlamaya bilməzdim), qəribə və qorxulu kostyumlar geyəcək ki, gəlmələr (o dünyadan gələnləri nəzərdə tuturam) onları özününkü bilib ayıra bilməsin. Hər ailə iri bir kudunun içini çıxarıb onun qabığında qorxulu fizianomiya oyaraq içində şam yandırıb qapısından asmalıdı ki, qorxulu ruhların özünü də qorxuda bilsin. Bu məqamda özünü şərdən qorumaqçün qapısına it kəlləsi asmış bir ailə düşdü, hayıf yeri deyil...
Bu gecə hamının özünü əcinnə, cin-şeytan, yaxud iblis kimi hiss eləmək şansı var. Çoxlarına maraqsız gələcək, deyəcəklər ki, il boyu bəyəm insan kimi yaşayırıq? Bu gecəni layiqincə qeyd eləməliyik, heç olmasa amerikalıların xətrinə. Güzgüyə baxın. Öz görkəminizə nə qədər tənqidi yanaşsaz da qrimsiz keçinə bilməzsiz. Aeroport yarmarkasından alınmış ucuzlu kosmetikayla boyanıb ildə cəmi bir dəfə allergiyadan səpmək böyük qurban deyil. Bəs bizim cavan qızlarımız bu işi hər gün necə eləyir? Əsas məsələ lazımi obrazı seçməkdir, burda isə cəmi bir şərt var- təki özün olmayasan, vəssalam. Bizimçün bundan asan nə var?
Bilin ha, bu gecə gələcək və keçmişin qapıları açıq olacaq. Çətini qapını keçənəcəndi. Bəlkə elə bizim kandardan baxanda onlar çox vahiməli görünür. Bəlkə içəri keçək, görək bir nə var, nə yox? Şər qüvvələr olanda nə olar, hal-əhval tutaq, gündəlik həyatda şərlə barışdığımız səbrlə bir özümüzü onların yerinə də qoyaq. Deyirlər ki, bu gecə yarısı küçəyə çıxıb əyin başını dal-qabaq geyib tərsinə gəzə bilənlər mütləq küpəgirən qarı görəcək.
Hellouinin duzu-istiotu «Həyat ya pul kisəsi» hədə qorxusundadı. Quldur, cin-şeytan, cadukərlər, polis simasında kimsə sənin xirtdəyindən tutub kisəsini doldurmaqçün gözünə soxursa bilin, bu hələ də Hellouin gecəsidir. Evdar xanımların nəzərinə: nəbadə bu gecə alt paltarını zivədə qoyasız. Şər qüvvələr bircə ora əl atmamışdı, doluşarlar oralara. Bu səhədə də uduzsaq, day heç olduq ki!
Küçələrə çıxmaq istəyənlərin nəzərinə, biləsiz, bizimkilər hellouin -zad tanımır. Sizi əsil cin-şeytan bilib polis şöbəsinə də daşıyarlar. İçərinizdə kimsə dilli-dilavər parlamentyor, elçi missiyasını üzərinə götürüb izah eləməlidi ki, «Bilirsiniz, Hellouin belə bir bayramdır ki,.....» Əgər sizin kompaniya müqəddəs inkvizisiya roluna girməyibsə, yaxud erməni kilsəsiniə od qoymağı qərar verməyibsə məncə sovuşar. Uzaqbaşı decəklər ki, müxalifət mitinqləri gecə saatlarına salıb.
Elit cavanlarımız bu bayramı hələ 27 –si «Chillout» klubunda keçiriblər. Elə bil həftə içi qorxulu olmaq olmazmış? Deyələnə görə kostyumsuz gələnlərə içəri keçmək üçqat bahasına başa gələcəkmiş.
Amerikalı uşaqlar bu bayramı gecə qapını döyüb «trick or treat» (bir az azad tərcümədə «qonaq elə yoxsa peşman olarsan») deyib ev yiyəsinin üzünə irişirlər. Simic ev yiyələrinin qapılarının dəstəkləri qapqara külə batırıla bilər. Bundan sonra bizim papaq atdı əməliyyatının məsumluğundan noema qoşmayım, neyniyim?
Səhər evdən yanmış şam, mətbəxdən dünənki kududan bişirilən balqabaq qutabının iyi gəlirsə, deməli şər qüvvələr bu gecə sizdən yan keçdi. Səhəri küçəyə çıxanda üz–cözü qapqara, ya da rəngbərəng, qışqırışan çığırışan, səndən həyatının əvəzinə pulunu istəyən, hədə qorxu gələn, göz ağardan, canını almaq istəyənlər tapılacaqsa bil ki, bu hələ də Hellouindir. Bizdə bu il boyu bitmir. Elə bil kimsə o tayın qapılarını açıq qoyb gedib, murdarlıqlar da elə bil öz evindədi. Yaxşı, oraları dolaşıb gələndən sonra dalınca qapını bağlamazlar, a millət!