Milli xəbərlər

Verilişimizə başlayırıq, əziz dinləyicilər. Günün ən maraqlı, ən vacib xəbərlərini bizlə dinləyin. Amma bilin, kötüyünəcən çəkilmiş siqaret insan həyatını, ah bağışlayın, iş gününü 12 dəqiqə qısaldır. Yuxuları xatırlayırsızsa onu yoza da bilərik. Əgər siz görürsüz ki, məşhur «ulduz»la evlənmisiz, «Ailə sevinci»ndə maşın udmusuz, «novostroykada» ev götürmüsüz və təmir «vot-vot» bitmək üzrədir, deməli indilərdə saatın zəngi çalacaq. Təbrik edirik, iş vaxtı bitdi.
İndi isə vacib xəbərləri dinləyin. Məlum səbəblərdən adının açıqlanmasını istəməyən vətəndaş N-in qəribə ailə tərkibi vardır. Onun sonuncu qızı sonuncu arvadından bir neçə yaş böyükdür. Bu qızın həyat yoldaşı isə qaynatasından 10 yaş böyük olduğuna görə arabir ağıllı məsləhətlər verməyi özünə borc bilir.
Qonşularla isti, hətta qaynar münasibətləriylə seçilən Fatma xala bu gün «təcili yardım» çağırmağa məcbur olmuşdur. Amma narahatçılığı əbəs imiş. Həmişəki kimi stakanı divara dirəyib qonşulardan «hal-əhval tutarkən» ona elə gəlmişdir ki, onlar nəfəs almırlar, yəni boğulublar. Gözlərini ovuşduraraq qapını açan qonşusunu görəndən sonra Fatma xalanın ürəyi yerinə gəlmişdir.
Sürətlə inkişaf edən elm zamanında alimlərimiz də əli qoynunda oturmayıb. Azərbaycanda yeni robot növü icad edilmişdir. Hətta deyirlər ki, o, insandan ağıllıdır. Amma hamını bir sual narahat edir: «Bəs görəsən o, indiyədək niyə evlənməyəib?».
123456 saylı Bakı məktəbinin müəllimi nəhayət ki, şagirdlərinin alın yazısını oxumağa başlayıb. Mətndə oxunulmayan hissələr onların əllərinin içindəki yazılarla şərh edilə bilir. İndi yoxlamalar böyük ruh yüksəkliyi və öncəgörməliyi şəraitində keçir.
Xırdalanda yaşayan vətəndaş M yenicə tikdirdiyi mənzilində susuz, işıqsız və qazsız şəraitdə 20 gün yaşamışdır. Bu, küləyin açıq dənizə apardığı buz parçası üzərində sağ qalmış norvecli Erikin əldə etdiyi nəticələrdən bir sutka artıqdır. Daha bir idman xəbəri, Nargin adasında su altında qalmaq üzrə yeni dünya rekordu qeydə alınmışdır. Amma bu müddət hələ ki, dəqiq məlum deyil. Çünki su altından sonuncu hava dənəcikləri «bul-bul» edəndən sonra idmançı hələ ki, suyun üzərinə çıxmamışdır. Müxbirlərimiz hadisə yerində növbə çəkirlər ki, ilk kadrları sizə isti-isti göstərə bilək.
Ölkəmizdə qadınların rəssamlığa meylləri artıq göz qabağındadır. Fərdi sərgisində rəssam tablosunda yamyaşıl meşə və kəndli komasının qarşısında oturmuş küpəgirən qarıya bənzər personajın təsvirinə çox orijinal ad tapmışdır. Tablo «Qaynana» adlanır. Rəssamın müxbirimizə verdiyi müsahibədə o, demişdir ki, tablonu 8 mart bayramına ithaf edib və həmən gün onu məmnuniyyətlə səbəbkara hədiyyə verəcəkdir.
Ev axtararkən, yəni yeni tikilən binalardan birində yuva qurmaqçün tanımadığınız ərazilərdə binalara baxarkən azmısızsa «au!» çığırmayın. Əvvəla səsinizi eşidən olmayacaq. İkincisi isə bilin ki, (bunu məktəblərdə də tədris edirlər), nəmişlikdən yosunlaşmış və göbələklər bitirən divar həmişə şimal tərəfə düşür.
Total tikinti şəraitində də mühəndislərimiz əli qoynunda oturmayıb. Bu günlərdə maraqlı hadisə baş verib. O adlı mühəndis ona həvalə edilmiş çertyojlarda baş çıxarmasa da özünü itirməyib. Yaşayış evinin altında mağaza tikmək əvəzinə özünə dəniz kənarında ikimərtəbəli bağ evi tikib. Bununla da peşəkarlığının yüksək səviyyədə olduğunu sübuta yetirib.
Axşam cəzintisini sevənlərin, daha doğrusu gecə zülmətində küçələrdə cəzişənlərin nəzərinə: yenicə basdırılmış işıq dirəklərinə diqqətlə baxsaz görərsiz ki, onlar heç də hamısı bir-birinin tayı deyil! Onlar arasında da kifayət qədər simpatik dirəklər var. Nə olsun ki, işıqları yanmır?
Bu süjet isə Bakı şəhəri meriyasının şəhəri və vətəndaşları nə dərəcədə sevdiyini bir daha sübut edir. Qar vaxtı vətəndaş R evinin qarşısındakı qar yığınının olmasından şikayət etmişdi. Onun dediyinə görə küçənin qarını yığışdırıb qapısının ağzına topaladıqlarına görə evdən çıxa bilmirmiş. Düzdü, tədbir bir qədər geciksə də axır ki, görülmüşdür və həmin vətəndaşın qapısının ağzına bir maşın qum boşaldılmışdır ki, o, sürüşüb yıxılmasın.
Makaron fabrikimiz isə yeni məhsulları evsiz-eşiksizlər üçün nəzərdə tutmuşdur. Yeni makaron məmulatı böyük diametrdə olduğundan onu həm bayırdan, həm də içəridən yemək olar. Məhsul sınaq təcrübələrini uğurla keçmişdir.
Bizim mühəndislər bəzən işə o qədər aludə olurlar ki, həndəsə qanunlarının da üstündən çarpaz xətlər çəkib onu inkar edirlər. Bu günlərdə 16 mərtəbəli binanın divarlarının 9-cu mərtəbədə kəsişməsilə düz xəttlərin kəsişməməsi qanunu darmadağın edilib. Binanın sahibi yuxarı mərtəbələrin sakinlərinə nə deyəcəyini hələ ki, bilmir.
Qısaca hava haqqında. Br-r-r! Burnunu bayıra çıxarası deyil. Xoşluqla qalın və bizi dinləməyəi unutmayın. Bilin ki, martın əvvəlində hava xoş, səma ulduzlu, ətraf romantikdirsə növbəti uşaq dekabrda doğulacaq.