Üç manat pul, bir kəllə qənd!
Ya da «Palaza bürün elnən sürün?»

İndi kimi danışdırırsan, toydan şikayətlənir. Vallah bu ailə tədbirləri bizim axırımıza çıxacaq. Onsuz da boş olan cibimizin axırına çıxdığı bəs deyil, sağlamlığımızın kürəyini yerə vuracaq və onsuz da skeptik olan qəlbimizin son ümid işartılarını öldürəcək. Ye ki, yeyəsən, oyna kı, oynayasan! Nə qədər olar? Əvvəldə vağzalı, sonra bir-iki türk havası, ortada tərəkəmədən, lezqinkadan, şoloxodan, axıra yaxın vals havası, sonra aş, sonra tort, şarlar və sonda yenə də vağzalı. Ola bilər modern toydusa Eyyub Yaqubov vağzalı üstündə «Dur yola sal əziz balanı» deyəcək, ya da toyarası işıqları keçirib cavanlara diskotekada atılıb-düşmək imkanı yaradacaqlar. Vəssalam. O qədər şitini-şorunu çıxarıblar ki, bakirəlik simvolu olan ağ paltara da, hətta kəbin mərasiminə də ağız büzməyin gəlir. Toy sahibi eşidər və deyər: «Bəs neynəməli?!». Eşitmiş olarsız, dünyada ekzotik toylara maraq artır. Yəni ki, bu əziz gün kimsənin toyuna bənzəməsin və yaddaşlarda uzun süddət qalsın. Mən sadalayım, siz seçin.
Gündəlik bazarlıqlar bezməmisizsə, supermarketdə evlənə bilərsiz. Bunu bir amerikalı cütlük təcrübədən keçirib. Amma onların üzürlü səbəbi vardı. Gəlin kassirdir, bəy isə alıcı. Onlar belə tanış olmuşdlar.
«Deep Sea World in Fife» adlı akvariumda da toy eləyənlər tapılıb. Yeni evlənənlər sualtı aləmi dəlicəsinə sevirmişlər, ona görə belə seçim ediblər. Nəhəng akvarumun içində olacaq bu toy üçün xüsusi ağ paltar və qara smokinqə oxşayan hidrokostyumlar tikilib. Hətta gəlinin suyun altında tullayacağı xüsusi gül çələngi də vardı. Amma qonaqlar və keşiş mərasimə şüşə dalından başmalı idilər. Təzə evlənənlər indidən qonaqlarını öz aləmlərinə buraxmaq istəmirdi.
Samaradan olan bir cütlük isə nə üstüaçıq kabriolet, nə bəzəkli maşınları vacib saydı. Onlar nikah mərasiminə sevimli velosipedlərində gəldilər. Qonaqlar isə 10 velosiped kotejindən ibarət idi. Amma onlara vilosiped üstündə nikah kəsdirməyə qoymadlar.
Cənubi Koreyadan olan bir cütlük toy mərasimi üçün qaçış meydanın seçmişdi. Özü də qaçış yollarında idmançılar qaçan zaman. Ona görə də qonaqlar tez-tez yerlərini dəyişməli olurdular ki, ayaq altda qalmasınlar. Gəlin isə toy paltarını əlinə alıb o yan-bu yana keçməkdən ləzzət alaraq bəylə o qədər gülmüşdülər ki, ətrafdakılar bunu nəsə bir zarafat kimi qəbul etmişdi.
Hindistanda bir cütlük toyu telefonla etmişdi. Gəlinin yaşadığı şəhərdə hərbi əməliyyatlar gedirdi və komendant saatı təyin edilmişdi. Ona görə də gəlin nikah mərasiminə gəlib çıxa bilməmişdi. Bəy xərci batrmamış və gəlinin razılığını telefonla alaraq toyu təxirə salmamışdı.
Nepaldan olan bir cütlük isə Everest dağının zirvəsində evlənməklə dünya rekordu qoymuşdular.
Rusiyada bəy toyda həkim paltarı geyərək gəlinin evinə «Təcili yardım» maşınında gəlmişdi. Şahidlər də ağ xalat geymişdi. Gəlini isə evdən ağ paltarda yox, üstünə ağ döşəkağı salınmış şəkildə xərəkdə çıxarmışdılar.
Amerikalı bir cütlük isə təyyarədə evlənmişdi. Mərasim zamanı gəlini təyyarənin bir qanadına, bəyi isə o biri qanadına möhkəmcə sərimişdilər. Keşiş isə cisminin qeydinə qalaraq kabinədə qalmaq əvəzinə özünü ön şüşəyə çöldən bağlatdırmışdı. Ölüm-zülümlə «İndi sizi ər və arvad elan ediləm» cümləsini deyəndən sonra öpüşməyi bir qədər təxirə salıb təzə evlənənlər bir az uçmaq istədi. Sonra yerə enib adət üzrə öpüşdülər və üzükləri bir-birinin barmağına taxdılar.
2003-cü ilin 11 avqustunda isə tarixdə ilk dəfə kosmik toy baş tutdu. Beynəlxalq kosmik stamsiyanın komandiri Yuri Malençinko rus mənşəli amerikalı Yekaterina Dmitriyeva ilə evlənirdi. Nikah zamanı gəlin yerdə, bəy isə göydə, daha doğrusu kosmosda idi. Düzdü, bu tərz evlənmə bəy və gəlinin valideynlərinin xətrinə dəydi. Ona görə də yerə enən kimi adi adamlar üçün, hamı kimi toy çalınmasını tələb etdilər.
Londonlu milyoner qadın Şaron Tandler öz sevib seçdiyi adamına, 35 yaşlı Sendiyə ərə gedərək ona öz soyadını verdi. Eylata sakini olan bəy sualtı qayalarda yaşayır və vaxtının çoxunu suda keçirir. İş ondadır ki, o delfindr və adam kimi sahilə çıxıb smokinq geyə, qalstuk taxa bilməz. O, hətta gəlinin barmağına üzük də sala bilməyəcək. Amma bu gəlin üçün maneə deyil. O, Sendiyə 15 il əvvəl vurulub. O vaxtlar Şaron bura dayvinqlə məşğul olmağa gəlirdi. Odu-budu ər simasında yanında delfindən başqa kimsəni görmək istəmir.
Bu yazıya sonluq düşünmək istəyən zaman öz toyumu xatırladım və dodağım qaçdı. Əhvalınızı qaldırmaqçün siz də öz toyunuzu xatırlayın. Qoy hərənin öz sonluğu olsun…