Kimlərə qaldı meydan?
Yaxud sıravi jurnalistin ürəyindən keçənlər…

Atalar düz deyiblər, gündə bir şey eşitməsə adamın qulaqları uzanar. Düşünürdüm ki, səhər əl-üzümü yuyandan sonra internetdə eşələnim, qələmimin ucuna bəlkə bir ulduzdan-zaddan birisi ilişər. Redaksiyada məni danlayırlar ki, belə də müəllif olar? Yerli miqyaslı ulduzlarıdan niyə tənqidi material yazmırsan! Bıy, başıma xeyir, nə görsəm yaxşıdı, indi jurnalistlər də oxuyacaq!? Bu yaxınlarda «Oxuyan mətbuat» adlı layihə hazırlanır. Deyirlər, hələ unudulmamış keçmişdə duelə çağıran tək, əlcəyi rəqibin üzünə çırpmaq tərzində jurnalistlər müğənniləri döyüşə çağıracaq. Yayın cırhacırında əlcək nədi, bilməm? Layihənin bu detalını tapan adam yəqin hələ də 19 əsr romanlarında ilişib qalıb. Əlqərəz, əlcəyi götürdümü (Ağzı nədi götürməsin, millətin gözü elə onlardadı. Götürməsə, mətbuat bir şivən qopardar ki…) innən belə şou başlayacaq. Təzə-təzə jurnalistlər duelə çağırdığı müğənnilərin repertuarını «dişinə salacaq», daha doğrusu boğazına. İlk addımlardı, bir az fora vermək lazımdı da… Bəyəm biz müğənnilərin hər cəfasını çəkməmişik? Amma sonra jurnalistin ayağı ki, yer aldı, bir-iki çəpik səsi eşitdi, necə deyərlər Hüseynova bacıları kimi «öz məharətlərini göstərəcək». Şir ürəyi yemişləri lap axırda seçdiyi müğənniylə duet də oxuyacaq. Layihənin müəllif və prodüsseri Zaur Kamal «İnanın mənə, iştirakçılardan bəziləri elə oxuyur ki, ulduzlar ona həsəd aparacaq» deyib. Demək bizdən, inanmaq sizdən.
Hələ bir modnı adı olan «MARKA prodakşn» beynəlxalq prodüsser mərkəzi qısa zamanda iştirakçıları cilalayacaq ki, birtəhər səhnədə durmağı öyrənsinlər. Birdən Allah eləməmiş başlarına pomidor-zad atarlar. Bu yerində məncə təşkilatçılar çoş ehtiyatlıq eləyib. Deyirsiz, cig-cig oxumaqlardan min işarəlik reportajı bir sutkaya bəzəyən, klip təqdimatlarında oturmaqdan şalfarını ağardan jurnalist ulduz qabağından qaçar, səhnədə duruş gətirə bilməz? Ya da ki, ulduzlarımız səhnədə ayıb-ayıb bir ayağını qoyub o birini götürəndə, xoruz buraxanda bizlərdən biri onlara pomidor atıbmı, a tövbə!? Yəqin ulduzlarımız da ürəyiyumşaqlıq edib səhnəyə çıxdıqları ilk, ürkək addımlarını xatırlayar.
Oxucu, əlini qəzetdən çəkmə ya… Deyərsən, «noolsun, oxuyanım azıydı, biri də artdı». Layihənin duzu, istiotu ondadı ki, jurnalistlərin oxumağına dözəndən sonra ulduzlar əlinə qələm alıb bu sahədə ozlərini sınayacaq. Dözümlü xalqım, sənin başına nələr gələcəkmiş? Ulduzlardan kimisi şounu aparacaq, danışmağı düz-əməlli bilməyənlərsə yazacaq. Onlar oxuyan jurnalistlərdən müsahibə götürəcək, hələ bir fikir də söyləyəcək. İlahi, hələ eşitmişəm ki, KİV öz səhifələrində bu yazılara yer də ayıracaq. Onlar nəinki reportaj yapacaq, hələ bir mədəniyyətin ümdə məsələləri barədə ciddi diskusiyalar da yaradacaqlar. Ürəyimə damıb, ulduzlarımız ömür boyu gözlədikləri, amma heç vaxt eşitmədikləri sualları verəcək. Qorxuram. ki, qəzetimiz onlara yer ayırsa birinci mənim köşəm zavala gələcək. Axı o, axırdan birincidi!
Onu da eşitdim ki, Aygün, Röya, Nadir Qafarzadə artıq bu işə qol qoyublar. Jüri də necə lazımdı həm o, həm də bu taydan seçiləcək. Eşitdiklərimin yerdə qalanına inanmadım. Guya layihə beynəlxalq səviyyəyə çıxacaq, hətta Türkiyə və Şotlandiya müğənniləri artıq maraq göstərib. Bu fikir ürəyimin gizli qatlarında, hardasa 40-cı otaqda gizlədiyim arzuları oyatdı. Özümü səhnədə, Tarkanla əlbəəl çıxış eləyən yerdə gördüm. Heç qorxulu yuxularımda da cəsarət edib geyə bilmədiyim libasların şıx-şıxını o qədər aydın hiss elədim ki…Oxucu, səbrini bas, uzun-uzadı yazıram ki, seçki komissiyası məni də görüb seçsin. Mən də «yeni formatlı mədəniyyət»in bir damlası olmaq istəyirəm! Nə vaxtacan pərəstişkarımı tanımadan, onun gözlərinə baxmadan yaşayacam!
Bir təklifim də var. Qoy birinci dəfə oxuya bilən jurnalistlər səhnəyə çıxsın. İkinci dəfə isə oxuya və danışa bilməyən müğənnilərlə yaza bilməyən jurnalistlər yarışsın. Məncə bu daha maraqlı olar. Axı, heç nə bacarmayanın dam boyda ambisiyası olur. Bizim zəmanədə hikkəsiz heç nə qazana bilməzsən. Elə deyilmi?