Araşdırmalar, tədqiqatlar, fikir yürütmələr

Yaxud, sadəcə həyat təcrübəsi

Əlaqə saxlaya bilərsiz

«Uşaq kimi olun, onda qurtularsız»

Bir neçə gündü dünya Fransa prezidenti Sarkozi ilə bağlı xəbəri ləzzətlə müzakirə edir. Sarkozi ölkədə yaşayan qaraçıları sürgün edəndən sonra katolik kilsə ilə araları dəyib. Hətta kilsə prezidenti anafema, yəni kilsədən ayrılma ilə hədələyir. Kilsə insan hüquqlarının müdafiəsinə qalxan zaman Sarkozi özünü görməməzliyə və eştməməzliyə vurub. İş o yerə çatıb ki, Sen-Marten kilsəsinin rahibi d’Eskerm dualarının birində Tanrıdan Nikolya Sarkoziyə infarkt göndərməyi xahiş edib.
Dua etdiyi bəs deyilmiş, həmin keşiş bunu jurnalistlərə etiraf edib. Hərəkətindən bir az peşmançılıq çəksə də 2 ayağını bir başmağa dirəyərək Vətən qarşısında xidmətlərinə görə bir az əvvəl aldığı Milli ordeni qaytararaq dilimizin koloritli ifadələriylə desək onu hökumətin başına çırpıb. Günün əsas hissəsini dua etməkdə keçirən rahib üçün bu addım ən qəddar və ən təsirli hərəkət sayıla bilər. Çünki duanın gücünü ondan yaxşı kim bilər ki? Keşişlərin, rahiblərin, din xadimlərinin, mollaların günü Allaha dua ilə keçər.
Tətbiqi sehr praktikası
İlk baxışda rahibin Tanrıya mesajı qarğış kimi də görünə bilərdi. Amma qarğışı bir dəfə edirlər, duanı isə davamlı surətdə. «Duanın gücü» ifadəsi sadəcə gözəl söz birləşməsi deyil, o, həqiqətən də kömək etmək qüdrətindədir. Tarix boyu dəfələrlə ölümcül xəstənin yatağı qarşısında dua edənlərin sehri gözləriylə gördüyü anlar olub. İnsan həyatında da belə sehirli məqamlar olur ki, dilindən çıxmağı ilə çin olmağı bir olur. Belə anlarda insanlar, xüsusilə də Allahı danan, ilahi qüvvələrə inanmayanlar hansısa çox güclü və anlaşılmayan bir qüvvə ilə üz-üzə olduğunu anlayır.
Ocaqların sirri hələ ki, açılmayıb
Duanın gücünü ölçmək istəyi ilə ABŞ-ın İndiana ştatı Universitetinin professoru dinşünas alim Kendi Günter Braun başda olmaqda tədqiqat qrupu təcrübələr aparıb. Təcrübə altında olanlar üçün şəfa verici amil onların yaxınları və qohumlarının duaları tətbiq edilib. Çünki xəstə üçün əksər hallarda elə onlar dua edirlər. Təcrübələr Mozambik və Braziliyada aparılıb. Təcrübə altında olan 25 nəfərdən 14-ü eşitmə ilə problemi olduğunu deyir, 11 nəfər isə kor idi. Nəticələrin dəqiq olması üçün alimlər audiometr də işlədirdilər ki, tam əmin olsunlar. Nəticədə 2 nəfərin eşitmə qabliyyəti, 3 nəfərin isə görmə qabliyyəti gücləndi. Mozambikdən olan qadın əvvəl deyirdi ki, kor olmasa da burnunun ucundan o yanı görə bilmir. Amma dua edən şəxs əlini onun başına qoyub bir neçə dəqiqə dua edəndən sonra o qarşısındakı əlin barmaqlarını saya bildi. Adətən belə nəticələri alimlər o qədər də ciddi qəbul etmir. Amma onlar həmçinin kilsələrin, məscidlərin, müqəddəs kitabların, abidələrin şəfaverici sehrini də izah edə bilmirlər. Ümumiyyətlə elm belə sürüşkən məsələlərdə geri çəkilir, ən cəsarətliləri isə xırda faktları etiraf etməklə kifayətlənirlər. Elm pirlərdə, ocaqlarda dua etməklə sağalanları, niyyət edərək uğur tapanları nə inkar edir, nə də təsdiqləyə bilir. 21-ci əsrdə, texnikanın, elmin inkişafı yuksək olduqca belə yerlərə, yəni əl altında heç bir alət, köməkçi element olmadan yalnız fikrin gücü ilə işləyən müqəddəs yerlərə maraq və tələbat da artır. Bu yaxında «Yer üzündə 100 sehrli yer» adlı kitab işıq üzü görüb. Burada insanların qədimdən bəri pənah gətirdikləri yerlərin təsviri verilib. Minilliklər boyu insanlar buralara gəlir və yalnız dua etməklə sözlərini Allaha çatdırırlar.
Ölümü geri çəkmək
İnsan hətta ölüm ayağında olanda da dua eləməkdən qalmır. Bəşər övladının Allahdan dilədiyi ən ümdə arzu isə sağlamlıqla bağlıdır. İnsanlar ölməyi sevmir, qorxur, bu günü mümkün qədər uzaqlaşdırmaq üçün durmadan dua edirlər. Oqayo Universitetinin doktoru Donna Yunqun tədqiqatının nəticələrinə inansaq insanlar müəyyən elədiyi tarixə qədər ölümü uzaqlaşdıra bilirlər. Təcrübədə 300 min hadisə tədqiq edilib. Məlum olub ki, Milad bayramı, Şükranlıq günü və pasientlərin ad günlərində ölümlərin sayı azalır. 4000 hadisədə isə ölüm sanki bir neçə gün geri çəkilib ki, arzlayanın diləyi yerinə yetsin.
Dua bakteriyaları öldürür
Dua yüngülləşdirir. Dinindən, dilindən, irqindən asılı olmayaraq insanın etdiyi dua onun təkcə cismini deyil, həm də ruhunu təmizləyir. Duanın şəfalı keyfəiyyətini çoxdan kəşf ediblər. Amma tədqiqatlar nisbətən cavandır. ABŞ-ın Şimali Karolina ştatının Hersoq Universitetində yerli hospitalda 700 xəstə üçün dua etməyə bir neçə monax və müxtəlif din nümayəndələri dəvət edilib. Nəticələrə görə dualar sayəsində pasientlərin 93 faizində nəzərə çarpacaq dərəcədə müsbət dəyişikliklər qeydə alınıb. Dua xüsuilə ürək xəstələrinə daha yaxşı kömək edib. Dua təkcə insan orqanizmində deyil, təbiətdə də müsbət dəyişikliklər edə bilir. Xüsusilə də su duaya ən tez reaksiya verən ünsürdür. Sidq ürəkdən edilmiş dua qızılı stafilakokk və bağırsaq çöpü kimi ziyanlı bakteriyaları sıradan çıxara bilir. Duadan sonra suda bu bakteriyalar 100 dəfə azalırlar.
Uşaqlığımıza qayıdaqmı?
İndiədək insan beyninin fəaliyyətinin 3 əsas fazası olduğu qəbul edilib: ayıqlıq, yavaş yuxu və tez yuxu. Hər fazanın da özünəməxsus bioritmi var ki, bunu aparatlarla qeydə alıb fərqləndirmək olur. Dua edən insanın beyninin ritmləri o qədər yavşıyır ki, 4-cü, yeni bir faza haqqında danışmağa əsas verir. Təcrübələrdə seminaristlər, keşişlər, katolik ksendzlər, müsəlmanlar, dzen-buddistlər, hind meditasiya ustalar iştirak edib. Onlar dualarını pıçıldadıqca tədqiqatçılar onların beyninin siqnallarını qeydə alırdılar. «Dualı ayıqlıq» adlanan 4-cü fazada beyin demək olar ki, sönür. Bu artıq şüur üçün bədəndən kənarda yaşamaq imkanıdır. Elektroentsefaloqramda belə görüntülər vardı: normal adamın beyni 8-30 qerts arası alfa və betta bioenerji şüalandırır. Dua edənlər zikr elədikcə onların beyni 3 qertsə qədər enərək aşağı tezlikli şüalar buraxmağa başladı. Bu tezliyi həkimlər «delta ritm» adlandır. Bu tezlik 2-3 aylıq uşaqlarda müşahidə edilir. Bunu neyrofizioloji dilə çevirsək dua edənlər sanki uşaqlıqlarına qayıdırlar. Dinindən asılı olmayaraq bu dua edənlərin hamısının başına gəlir. İncildə belə bir cümlə var: Uşaqlar kimi olun və siz qurtulacaqsız.
Ölməzdən əvvəl Allaha qovuşmaq
Məşhur tədqiqatçı Alen Bombar deyib ki, dənizdə fəlakətdən sonra insanlar susuzluqdan, aclıqdan, ya da fırtınadan ölmürlər. Onlar qorxudan ölürlər. Həmin alim qorxusunu ram eləmək üçün düz bir ay dənizin ortasında yeməksiz, susuz taxta salın üstündə yaşayaraq öz qoxusuna qalib gəldi. Bütün xəstəliklər, fəsadlar, bədbəxtliklər insanın ölüm qorxusundan başına gəlir. Allaha inamı olan adamlar isə ölümdən qorxmur onu labüd hal kimi qəbul edir, «Ölüm haqdır» deyib taleyini Yaradana tapşırırlar. İnamı və İmanı olanlar dua edərək hələ ölməmişdən əvvəl Allaha yaxın olurlar.
Xeyir və Şər bərabərləşməməlidir!
Müqəddəs Ramazan ayıdır. Hər gün hələ dan yeri qızarmamış minlərlə adam yuxudan durub dua edir. Allahdan kimisi səbr, kimisi dözüm, sağlamlıq, kimisi isə orucunun əvəzində dünya malı diləyir. Təmənnasız dua edənlər daha çoxdur. Deyirlər ki, şəkərin suya qarışıb onu şirin etdiyi kimi insan fikirləri də Kainata qarışıb ona tam verir. Həyatımızın şirin, yoxsa acı olacağı fikirlərimizdən və etdiyimiz duaların mahiyyətindən asılıdır. İndi Sarkozini infarkt vuracaq, ya yox, onu zaman göstərəcək. Çünki bunu arzulayan keşişin duasına deportasiya olunmuş qaraçıların da dualar qarışacaq. Təbiətdəki xeyir və şər tarazlığını pozmamağın xətrinə Fransa prezidentinin köməyinə bir ağız dua edək. Deyirlər ki, dünyada hər şeyin öz yerində olması üçün xeyir şərdən iki punkt artıq olmalıdır. Xeyir və şər bərabərləşən gün müharibələr olur.

Yuxariya doğru