Araşdırmalar, tədqiqatlar, fikir yürütmələr

Yaxud, sadəcə həyat təcrübəsi

Əlaqə saxlaya bilərsiz

Bal ayı

Qədim instinktin öyrənilməsi prosesi
Yaxud seksual inqilablar barədə düşüncələr

İnsan sevgidən başlayır. Onu anlamaqçün sevmək lazımdı.
Jan Qaver
İndi cəmiyyətdə baş verən dəyişiklikləri müşahidə edib baş bulayaraq «Deyəsən, seksual inqilab baş verəcək» deyirik. Danışanda qızaran adamlar yoxa çıxdıqca, göbəyi bayırda gəzənlər artdıqca, qod-boyun olub utanmadan adam arasında öpüşənlər normal hadisəyə çevrildikcə qorxularımızın reallaşması fikriylə barışmalı oluruq. Seksual inqilab nədisə (məqsədim terminin izahını və təsnifatını vermək deyil) əksəriyyətini qorxudur. Bu məsələ ilə heç kim ciddi şəkildə məşğul olmaq fikrində deyil. Tarixçilər sivilizasiyanın inkişafında neolit dövründə kənd təsərrüfatının çiçəklənməsini, yaxud ötən əsrlərdə səneyenin inkişaf sürətinin zərgər dəqiqliyilə ölçurlər. Amma heç kim demək istəmir ki, seksual inqilab daha vacib və nəticəsi göz qabağında olan bir prosesdi. Ola bilər onlar da bizim kimi bu iki kəlmənin adını tez-tez çəkmək istəmirlər.

Təbii olarsa utanmaq lazım deyil!
Seksual inqilabı bizim dövrün məhsulu sayırlar. Sovet dövründə sıfır səviyyəsində olan seks (bu ifadə xüsusilə gülünc səslənir, qırılardıq ki?!) haqqında informasiyanının «gizli» fəaliyyətdən çıxıb qısa müddətdə «inflyasiya» sürətiylə zirvəyə yüksəlməsinə adətən seksual inqilab deyirlər. Mağazalarda ananın qızına koftanın ən qısasını, şalvarın ən darını seçməsi inqilab deyil, bu mənəviyyatın xəstə dövrüdür. Konspirasiyadan çıxandan sonra pornoqrafiya məşhur prinsiplə öz ayıbını örtməyə çalışdı: «Təbii olarsa utanmaq lazım deyil!». Və tələsik cinsi münasibətləri bu kateqoriyaya aid eləyib bəraət qazandırıb leqallaşdırdılar. Axı təbiidir…
Utancaqlıq necə yarandı?
İki nəfərin arasında baş verənlər gizləmək instiktinin tarixi çox qədimdi. Əgdadlarımız (O dövrdə ki, milli dəyərlər adında anlayış da yox idi. Yəni əncir yarpağının hələ dəbdə olduğu zamanlarda) ehtirasa bulunanda gizli yer seçmək məcburiyyətindəydilər. Çünki beyinləri ehtirasdan dumanlananda yırtıcıların, hətta yoldan keçək təsadüfi adamın da təcavüzünə məruz qala bilərdilər. Bəlkə də utancaqlıq elə burdan yaranıb. Dal adlı alimin tərtib elədiyi rus dilinin izahlı lüğətində o, utancaqlığı «vicdanın zahiri təzahürü» kimi adlandırıb (məncə çox qəribə izahdır). Yer üzündə müasir iqlimə oxşar hava şəraiti yerini aldıqdan sonra müxtəlif zamanlarda dünyaya gəlmiş insan balalarından qışın sonunda doğulub gələn ilə qədər ayağa qalxan uşaqlar məhv olmurdu. Ona görə də fərz eləmək olar ki, insanlar may ayında vurulurdu ki, gələn qışın sonunda, yəni fevral ayında uşaq dünyaya gətirsin. Üzü yaza doğulan uşağın sağ qalmaq şansı çox olurdu. May ayında sevişmək bir növ sevgi qrafikinə uyğun yaşamaq kimi insanların təbii instinktinə çevrilmişdi. Sonradan sivilizasiyanın (ev-eşik, od, geyim və s.) yaratdığı süni mühit qrafikdən kənar doğulan çağalara da yaşamaq şansı verdi. Odur ki, sivilizasiyanın artım sürəti qrafikdən kənar sevgilərin doğulmasına təkan verir. İndi deyəcəksiz ki, sevginin seksə nə dəxli var. Mən anlayışları səhv salmıram. Düşünürəm ki, qədim insanlar sevgidən başqa bir hiss tanımayıblar. Bunu alimlər də təsdiqləyir, 3 milyon il əvvəl yaşamış avstralopitik adlandırılan qədim insanlar 500 kubik beyin həcminə baxmayaraq sevgiyə bənzər hisslər yaşayırdılar. Ola bilər ki, seks desəydik onlar oturub gözünü döyərdi. Necə ki, müasir insan sevgi sözünü eşidəndə beynində uyğun anlayışlar axtararaq oturub gözlərini döyür.
Sevgi qrafikindən kənar
Beləliklə yaşayış yerinin kosfortu artdıqca bir aylıq sevgi «bal ayı» uzanaraq «sevgi ilinə» çevrildi. Əgər səhv eləmirəmsə may ayında yığılan bal da ən keyfiyyətlisi olur. Bal ayında mağarasından çıxıb bal yeyərək sevişən qədim insanları rahat buraxıb bu günümüzə qayıdaq. Sevgi qrafiki genişləndikgə təbii ki, uşaqlar da ilin hər vaxtı dünyaya gələ bilirdi. Fərz olunur ki, qrafikdən kənar doğulanlar bioloji keyfiyyətlərinə görə fevral uşaqlarından zəif olmalıydı. Amma insanın hər şəraitə uyğunlaşma qabliyyəti nəslin kəsilməyinə imkan vermədi. Belə olmasaydı indi seksual inqilablar eləməyə adam tapılmazdı. Amma alimlər deyir ki, sivilizasiyanın tarixi nisbətən az olduğuna görə fevral uşaqlarının üstünlüyü indiyədək qalır. 10 Avropa ölkəsində aparılan demoqrafik sənədlər də bunu sübut eləyir.
Fərziyyənin xeyrinə, onu dolayısı yolla sübut eləyən başqa həqiqətlər də var. Məsələn, təzə evlənənlərin ilk ayını «bal ayı» dalandırırlar. Birlikdə yaşanan hisslərin ən gözəl dövrü ola bilər ki, qədim instinklərin ən-sədasıdır. O vaxtlar sevgi məsələsinə cəmi bir ay ayrılırdı. Bu müddətdə həm tədris məsələsini (sevgi texnikasını təkmilləşdirməyə bir ay çox azdı), həm də nəsil artırmanı çatdırmaq lazım idi. Sevgi ayının məhz may ayı olmasını isə mahnılar sübut eləyir. May ayına o qədər lirik mahnılar yazılıb ki… Amma bu ayda zorlamaların da qədəri artır.
Axmaqlar evlənir, ağıllılar isə ərə gedir
Çox guman ki, qadın orqanizmi də cəmi bir ay nəsil artırmaya hazır olub. Cinsi fəallığın sərhədlərini genişləndirdikcə təbiət məcbur olur qadın orqanizmini dəyişdirmək istəmədi. Sadəcə cəmi bir ay sürən sikli sonra bir də işə saldı. Daha sonra bir də, bir də… Beləliklə sikl bu günki kimi fasiləsiz işləməyə başladı.
Bal ayı bal ilinə keçəndən sonra daha bir problem də ortaya çıxdı. İndi il boyu seksə hazır kişilər üçün qadın qıtlığı əmələ gəldi. Çünki qadınların bir hissəsi «dekretə» çıxmışdı, daha bu rola yaramırdı. Bax, tarixin bu məqamında ən qədim peşə belə yarandı. Latıncadan «ləkələnmiş», «pozulmuş», «rüsvay olunmuş» kimi tərcümə olunan və nankor nəslin fəhişə adlandırdığı qadınlar yaranan prolemin həlli ilə məşğul oldular. Elə bilməyin ki, bal ilinə keçmək kişilərin də xeyrinə işlədi. Sevdiyi qadınla evlənib, uşaq dünyaya gətirib cavan, qüvvətli kişilərin qadınına marağını itirməsini təsdiqləyən minlərlə sübut var. Bu barədə psixoloqlar tez-tez yazır. Uşağın 2 yaşı tamam olan ərəfədə kişi arvadından elə bil ki, üz döndərir. Səbəbini yenə də tarixdə axtaraq. O vaxtlar kəbin, ya da nigah kağızı birləşdirməyəndə, pasportda möhir olmayanda iki nəfəri uzun müddətə bir-birinə bağlayan cəmi bir məqam vardı. Bal ayından sonra dünyaya gəlmiş uşağı ayağa qaldırıb müstəqil olanacan yedirib içirmək lazım idi. Antropoloqlar deyir ki, qədim valideynin üstündən bu yük elə uşaq 2-3 yaşına çatanda götürülürdü. Sonra yeni sevgilər axtarışı başlanırdı. Axı insan nəslinin artması kimi qlobal məsələ hələ də həll olunmamış qalır və yəqin ki, qədim kişiləri çox narahat eləyirdi. Bu bioloji növlərin yaşamında ən vacib məqamlardan biridir.
Müasir ailələrdə qısa müddətə ayrılan insanlar bir-birini günahkar bilir, taleyini lənətləyir. Amma iradlar ünvanına deyilməyib. Onlar sevginin itdiyinə görə ayrılmır. Sevgi yoxa çıxır ki, onlar ayrılsın. Bəzən deyirlər ki, axmaqlar evlənir, ağıllılar isə ərə gedir. Ağıllı adamlar deyir ki, qadın çox şey istəyir, amma bir kişidən. Kişi isə bir şey istəyir, amma çoxlu qadından. Neynək, insan nəslinin artması məsələsi bunu tələb eləyir.
Kişilər öz xoşuyla vurulmur
Bu yerində hər kəs soruşardı ki, «bəs bu prosesdə sevginin rolu nədir?. Sevgi kimyavi, seks fiziki prosesdi». Sevgi fenomenini izah eləmək lazım gələcək. Əlbəttə, axı sevgi olmasaydı da, nəsli davam elətdirmək mümkündü. Hətta qarşılıqlı cinsi maraq olmasa da uşaq dünyaya gələ bilər. Bioloji növlərin keyfiyyət məsələsini ön palana çəkən təbiət hər kəsi qadınla mükafatlandırmırdı. Kişilərdən ən güclüsü, cəsarətlisi, mübarizədə rəqibinə qalib gələ biləcək kişinin nəsil artırmaq şansı olardı. (Təəssüflə bu cümləni keçmiş zamanda yazmalıyam. Bu gün artıq belə deyil). Əgər hər kişinin bir qadını olsaydı kim öz sağlamlığını, bəlkə də həyatını bu prosesə qurban verərdi. Bu da danılmaz faktdır ki, kişilər öz xoşuyla vurulmur. Heyvanat aləmində erkəklər mübarizə eləyir, dişilərsə seçir. Bəs insanlarda necə? Hə, bu da baxır Yer kürəsinin hansı nöqtəsində. Hələ Russo yazırdı ki, sivilizasiyalı ölkələrdə kişilər özləri də bilmədən seçim obyektinə çevrilir. Amma deyək ki, bu da təbiətin qanunlarına uyğun prosesdi. Qadınlar kişiləri atalıq keyfiyyətlərinə görə seçir. Nəticədə onsuz da insan nəsli qazanacaq. Əgər Russoya inansaq doğulacaq uşağın keyfiyyəti iki turdan asılıdır. Birinci turda qadın ətrafından bəyəndiyi bir-neçə kişini seçir. (Kişilərsə bu vaxt düşünür ki, onlar seçir). Özləri də bilmədən birinci turdan keçmiş kişilər ikinci turda atalıq uğrunda mübarizə eləyir. Nəticəsi həmişə yaxşı olur, yəni dünyaya insan gəlir.
Bal ayına az qalıb
Bu ta qədimdən bəri belə olub. Sivilizasiyanın işə qatışmasının nəticələri də müxtəlifdi. Hardasa qadına təbii seçmədə imkan verməyiblər, onun vurulmaq haqqını əlindən alıblar. Hardasa «gözəl qadın» kultu yaradıblar. Ona görə də Avropa əlçatan qadınları heç olmasa görmək ümidiylə bura axışan gəlmələrin əlindən bilmir ki, nə etsin. Bizim yerimizsə həmişəki kimi ən rahat və ən problemsiz nöqtədədir. Burda hər şey var: zorla ərə verilən, evləndirilən, bir-birini toy gecəsi danışdıran cavanlar da, Braziliyi seriallarına baxıb kişilər uğrunda saç yolanlar, çimərlik kostyumunda şəhərə çıxanlar da. Sivilizasiya buralara çoxdan gəlib çıxıb və bizi artan sürətlə nəsil verməyə vadar eləyir. Yerimiz isti, çörəyimiz bol. Təbiətə qarşı çıxmaq olmaz!
İndi deyə bilərsiz ki, bütün bunları niyə yazırsan ki? Bir təqvimə baxın, qabaqda may gəlir…

Yuxariya doğru