Düzünü desəm, pisdən yazmaq istəməzdim. İstinin bu cırhacırında
mövzunu küçədə axtarası deyiləm ki. Odur ki, sağıma-soluma
boylandım, xalqımın yaddaşında eşələndim, gündəmimizi
gözlərim qarşısında daha real canlandırdım. Hadisələrin
gələr-çıxarını tərəziyə qoyub ağır gələndən, yəni pis
olanlardan yazmalı olacam. Düzdür, bizdə pis bir az artıq
düşüb. İstiotu çox düşən yemək kimi onu da birtəhər ötürmək
olar. Pisə pis-pis baxsan, o, həqiqətən, çox pis görünə
bilər. Gəlin bir az yumşaq baxaq, haydı, bir az da....
Alındımı? Sizi bilmirəm, məndə yaram saatlıq çalışmalardan
sonra nəsə alınmağa başlayır.
Təbiətdə olduğu kimi, cəmiyyətdə də kiçik bəla böyük dərdlə,
böyük dərd fəlakətlə unudulur. Axır vaxtlar böyük dərdmiş
kimi fahişələrdən çox yazır, çox göstərirlər. Kameranı
lap iş başındaca gözünə dirəyib qoymurlar bir parça çörəyini
qazana. Bax, kimə pislik eləyir, özündən başqa? Çox ehtiyatsız
olar, sifilisdən-zaddan tutar, sonra özü kimisini doğa
bilməz. QİÇS-ə yoluxsa, lap yaxşı, tezliklə əl-ayağı küçələrdən
yığışar. Bir də ki, Allahdan çox ixtiraçı olmaqmı olar?
QİÇS-i ortaya atıb ki, insanlar saf-çürük olsun. Bu bəladan
salamat qalanlar gecə fantaziyalarında belə tənha olacaqlar.
QİÇS-in özünə də ayrı cür baxmaq olar. Bu xəstəlik təbii
yolla çox yayıla bilməyəcək. Xəstələnmiş, amma hələ ölməmişləri
mütləq xəstəxanalarda, xüsusilə qanköçürmə institutlarında
işə götürmək lazımdı. Gəmiyyətin bu boyda etibarının qarşısında
ordakı antisanitariyadan yararlanıb qan çatışmayanda arabir
öz qanlarıynan kolbanın, necə deyərlər, başını düzəltsinlər.
Onda hamı bir-biriylə qohum olar, lap qan qohumu...
QİÇS-in fikrini çox çəkməyə dəyməz. Çünki o yemək ki,
bizdə var, hamımızı qıracaq. QİÇS virusu oturub fikir
çəkəcək ki, bir adam tapsaydım, törəmələrimi ona ötürərdim.
Bu bədən öləndən sonra neynərəm? Soya yağlarında yemək
bişirməkdən hamı bacı-qardaş olacaq. Bilirsiz də, soya
yağı tərkibinə görə qadın harmonlarına yaxındı deyən uzun
müddət onu işlədən kişilər özünü öldürsə belə, ən mürdar
fantaziyalarını işə salsa da, kimisə nəinki sevməyə, heç
zorlamağa da taqəti olmayacaq. Zorakılığın öhdəsindən
belə gələrlər ha!
Matriarxatdan QİÇS-dən daha çox qorxursuz? O da çox çəkməz.
Nitratlı yeməklərimiz bizdə can qoymayacaq. Bir azdan
kəndlərdə adam qalmayacaq, hamı şəhərə axışacaq deyən
torpaqda əkib-becərən tapılmayacaq. Hamı oxumuş, savadsız
və alim olacaq. Yerdə qalan peşələr hamısı bu üç kateqoriyaya
uyğun gələcək. Bizdə bəzən oxumuş sürücü, alim ofisiant,
savadsız müəllim kimi uyğunsuzluqlar olur. Onlar da keçib
gedəndi. Bir parça çörək uğrunda mübarizədə nəinki peşəni,
lap atanın adını da unudarsan. Yeməyə bir şey tapmayanda
xaricdən nitratlı meyvə və tərəvəzləri gətizdirib yeyib,
qısa müddətə olsa da, xoşbəxt olacağıq. Amma həşəratlara
yazığım gəlir, onlar lap tez qırılacaq. Qurd salmayan
unda, düyüdə necə yaşasınlar?!
Əslinə qalanda, nitratlar, hətta aclıq özü bir elə böyük
problem deyil. Onun öhdəsindən ozon dəliyi gələcək. Arta-arta
gəlib başımızın üstünü alacaq. Turizmin inkişafından sonra
ölkəmizə axışan, dənizimizi, torpağımızı, çörəyimizi,
güzəranımızı əlimizdən alanların hamısını elə çimərlikdəcə
yandırıb-yaxacaq. O vaxtlar hamı, kişili-qadınlı başını
örtməyə başladığından (cinsi məsələdə böyük fərq olmayacaq)
ziyanlı şüalar bizə bir elə toxunmayacaq.
Ozon dəliyi də bizə kar eləməz. Evlərin yerini baha qiymətə
villa və göydələnlər tikməkçün satdıqdan sonra torpaqda
qazma komalara köçənlərə şüalar neynəyə bilər? Bir də
eşitmişəm ki, ozon dəliyini vətəndaş müharibəsindən çıxan
tüstü-dumanla örtmək olar. Villalar, super evlərdə yaşayanlarla
qazma daxmalara köçməyə məcbur olanlar arasında müharibədə,
sizcə, viruslu, nitratlı, aclıqlı, sevincsiz və savadsız
adamlara qalib gəlmək olar. Eybi yox, sağ qalanların da
öhdəsindən ikinci ümumdünya daşqını gələr. Yaxşı olardı,
sel gəlib müharibənin fəsadlarını yuyub aparaydı. Bu dəfə,
görəsən, Nuhun gəmisinə kim düşəcək?
