Qalx ayağa, ey İnsan!
Bəsdir diz üstə durdun!
Yenə də gözünü qapının deyişindən çəkə bilmirsən?!..

Yazının başlığında erotik məqam axtaranların ümidlərini bəri başdan qırmalı olacam. Cavabında «İnternetdə bütün çılpaq şəkillər «Nü» rubrikası altında verilir. Bunu yeniyetmələr də bilir ki...» eşitməkdən də qorxmuram. Çünki bu «nü» həmin «nü»dən deyil.
Əslində «nü» çılpaqları abıra salıb bir növ geyindirmək cəhdidir. Yenə də belə məsələlərdə həmişəki kimi fransızların başı daha yaxşı işləyir. Görün necə gözəl səslənir: «Nü...». Xahiş eləyirəm, bu sözü «Nu poqodi» cizgi filmindəki «Nu, nu, nu» ilə səhv salmayasız. «Nü» sözündə təcavüz yoxdu.
Çılpaqlığa belə nəfis ad verəndə elə bil geyinmiş olur. Məsələn, çılpaq qadınların rəsmindən, yaxud fotolarından ibarət sərgiyçün necə deyəsən ki, filankəs lüt arvadların şəklini çəkdiyi bəs deyil, hələ bir göstərir də. Bir də var ki, deyirsən: «Filan rəssam «nü» üslubundakı işlərini sərgiləyəcək». Bax bu, başqa məsələ. Gözəl, hətta abırlı səslənir. Bunu lap qəzetdə də yazmaq olar, heç kim də səni erotik zir-zibili qəzet səhifələrinə çıxarmaqda suçlamaz.
Əslində çılpaqlıq həmişə erotik olmur ki. Məsələn, körpələrin çılpaq şəkillərinə heç «nü» də demək olmur. Onlar «nü»dən də qəşəngdi. Axtarsan, dünyanın ən abırlı insanlarının albomunda heç olmasa bir dənə çılpaq şəkli var. Həmin şəkillərə baxanların dodaqları o saat qulağının dibinə qaçır, şirin, dadlı xatirələr adamı başına alıb aparır. Bəzi çox kompleksli insanlar belə şəkilləri gizlətməyə də çalışır. Xüsusilə də ictimai statusu qalxdıqca düşünür ki, «nü» fotoları karyerasına əngəl törədə bilər. Çox hayıf ki, bizdə paparatsi əl-qol atmayıb. Bunu mən qəzetçi kimi yox, oxucu kimi deyirəm. Məsələn, özünü boğub oturan deputatların «nü» fotolarına baxıb «Uti, uti» deyib toppuş buxağını qaşıyaraq o qədər xoş hisslər keçirərlim ki... Çünki bilirəm ki, sonradan bu buxaq özünü dartmaqdan, popuşu isə kresloda oturmaqdan nə günə düşəcək...
Bax, bu abzasda qadın çılpaqlığından yazsam, yenə də məni kişipərəstlikdə ittiham edəcəklər: «Heç qadın da çılpaqlıqdan yazar? Qadın həmrəyliyi necə olsun?» və s. Cavabında «nü» üslubunu porno saytlarda axtaran oxucularıma Modilyaninin «nü» üslubunda olan rəsmlərini yada salacam. Görməyənlərlə təəssüratımı bölüşə də bilərəm. Elə bilərsiz Modilyanini lövhələrini canlı görmüşəm. Məndə o bəxt hardaydı. Reproduksiyalarına baxmışam. Təsəvvür edin: İri zal, divarlarda bir-iki metrlik kətan lövhələr. Hamısında fon qıpqırmızıdır (qırmızı fanarlar yanan kvartalların mənfi reputasiyasını nəzərə alıb bu rəngi mütləq reabilitasiya eləməyə ehtiyac var). Bütün lövhələrdə qırmızı fonda çılpaq qadın rəsmləri. Bütün lövhələr gözəllikdən çığırır, bağırır, müəllifin naturaya olan sevgisindən danışır, amma bir qram da porno təəssüratı yoxdu. Bunu hamı sevir və heç olmasa ömründə bir dəfə yaşamaq istəyir. Bax buna NÜ deyərlər... «Nü» öz tamaşaçısını qadın və kişiyə ayırmır.
Başqa bir çılpaqlıq növü var ki, onu nə qadınlar, nə də kişilər sevir. Həqiqət çılpaq olanda adamın gözünü deşir. Həqiqəti mütləq geyindirmək lazımdı. Rəngləmək, bəzəmək, abıra salmaq, ticarətçilərin sözüylə desək, ona «tovarnıy vid», yəni gözəgəlimli görkəm vermək lazımdı. Xüsusi qablaşdırması olmasa, çılpaq həqiqət piştaxtalarda tökülüb qalar, alan olmaz. Çünki həqiqət özü çılpaq olanda həyatımızın dekorasiyasını söküb dağıdır, əziyyətlə quraşdırdığımız səadət ilğımını bir saniyəyə heçə döndərir. Həqiqəti tapdalayanlar onu onsuz da nə çılpaq, nə də bəzənmiş formada eşitmək istəməz. Ruhən şikəstlər, zəiflər həqiqətin çılpaqlığına dözə bilməz, məhv olar. Bax bu, artıq NÜ deyil. Bu çılpaq doğulmuş həqiqətdir. Öz eybini əncir yarpağıyla örtməyi öyrənmiş insanlar həqiqəti hələ ki, qəbul eləyə bilməyiblər. Həqiqəti çılpaq görmək istəməyənlər hələ də onu geyindirə biləcək kütürye tapmayıblar.
Yəqin, mənimlə razılaşarsız, «nü» nədisə gözəl bir şeydi. Nə vaxt soyunacağını, nə vaxt bürünüb geyənəcəyini də hər kəs özü bilir. Amma birdən çox geyinənin beynindən yüngülləşmək istəyi keçsə, soyunması uzun çəkər, məncə. Siz qəbul eləməsəz də olar, bu, mənim şüarımdı: «Həmişə NÜ-yə hazır ol!».
Bu pionersayağı şüarın cavabını bilirsiz də?!.